大時代上腦症後群

"期油價格持續上升, 紐約期油收市價是兩年幾以來最高, 西方國家向敘利亞採取軍事行動的可能性越來越大 , 市場人士擔心, 西方國家一旦向敘利亞動武 , 中東原油供應將會受到影響"

29/8嗰朝睇到哩段新聞, 突然間腦海中浮現咗一個畫面; 大時代裡面既一幕...

話說個市已經跌咗好一段時間, 嗰時既投資氣氛非常差… 唔好話升, 只要嗰日個市唔跌都已經當升咗… 但方展博一入到去聯交所就周維同人講: 今日個市會升! 起碼升到一萬點(嗰時得9050)! 會升呀! 信我! 咪話我唔提醒你呀! 趁依家好入貨喇! 一萬點! 一萬點! 一萬點!

正當佢好似個傻佬咁周維同人講野而又冇人理佢之際, 丁蟹同佢嗰四個敗家仔就大支野咁行入黎, 仲大大聲咁話: 打仗喇... 死人喇... 美國已經兵喇... 仲買升?! 傻仔! 之後就係相方一輪街市婆罵戰...

突然, 開市鐘聲響起, 全世界既目光都集中喺塊報價板身上! 點知... 塊板完全冇動靜, 過咗幾分鐘都仲係唔郁... 丁蟹睇睇下燥底, 就開口對住塊報價板鬧: 做咩呀! 壞機呀?! 塊板壞咗呀?! 沽佢五張試下... 點知個沽盤就成咗, 但個市都係唔郁... 然後方展博就好得戚咁對住佢整鬼臉~ 丁蟹當唐激到囉柚都有氣... 正當佢地兩個互bear之際, 後面就有條茄呢啡好大聲咁嗌: 個市郁喇! 鏡頭一轉zoom咗去方展博個大頭度, 定格咗一陣... 之後佢就好似顛咗咁, 用盡全身既力嗌: 升!!!!!!

而後面發生咩事, 相信有睇過既人都仲記得~ 哩套野都係經典中既經典!

如果九月真係升市, 我一定會好似方展博咁嗌: 升!!!!!! wow~~~ 之後再開支香檳, 弔念下之前死得好冤枉既牛仔, 對住個街貨圖講: 218… 217… 216… 215... 我得咗喇! 我幫你地報咗仇喇! 之後再望住出面d肥熊自殺加俾人打靶, 睇住佢地續個大位俾人隊爆, 然後一路數: 一隻… 兩隻… 三隻...

白痴!!!!!!!!!!!!!!!!!!!!!!!!!!!!!!

幻想同拍戲始終係美好的, 但現實生活又點會俾你咁順利呢... 唔好忙記後面仲有一part係方展博終於解開咗佢師父既遺言, 內容類似係話股海風高浪急, 應速速逃離...

我當然明白哩個道理, 我不嬲都知道自己只係浩翰股海中既一粒微生物... 所以我每次都會做好風險管理, 就算九月唔升, 我之前做既跨期牛call裡面張short call 218 我已經食哂, 剩返張long call 216埋單計數我輸到盡都只係338點, 而如果見勢色唔對我輸到一半仲可以平倉走人, 況且成個月流流長我仲有時間去hedge返條數

所以話期權的確係醒! 係冇得頂!

(P.S. 大時代真係好好睇, 未睇過既八十後九十後一定要睇! 睇過既都一定要番睇! 正!)