估市解碼

找數時間

第一, 二幅圖講梗既資金流向: 自十二月尾開始, 港元續步走強, 隨即美元開始無力再上, 雖然滙率係一個相對強弱既指標, 一方轉弱另一方自然會走強, 但從股市既表現睇, 唔排除有部份既資金趁高沽美股買港股既可能性, 導致港股短期抽升, 12個交易日累計升幅已超過1500點

第三, 四, 五幅圖講既係盤路同走勢所帶出既訊息: 第三幅圖中, 1月10號期指加倉3296張, 而一張未平倉合約必定係由一買+一沽所組成, 因此有三千幾張call左未走, 自然就同樣有三千幾張沽左未走的, 然而如果要判斷邊一方既力度比較強，只要睇睇第二日個市點走就會估到

而其實係唔洗睇到第二日咁耐, 因為只要睇埋當晚美股同IG的走勢, 就已經可以分辦得到。當晚美股先升後倒跌，而IG卻一直能夠保持升勢，最終仍升2x點收; 11號返到黎期指更輕微再高開61點，其實走勢已經反映左已加倉既期指其實邊一方既力量比較強。結果當日個市直迫23000，而且再加倉3737張，從走勢及事情發展的來龍去脈睇，可以簡單判斷為： 好友於12號再度發力向上進攻

然而13號返黎個市高開低走，且全日跌92點，OI又再度大幅加倉4910張，哩個走勢同盤路個人會解讀為：好友繼續試圖上向進攻，卻遇淡友重兵駐紮於23000出力反樸，然而好友未有見阻力而退縮，反而積極護盤，尾市止跌並修復大部份跌勢收市

唔知大家仲記唔記得大概兩個月之前有一集節目係講即市技巧的，當中有講到OHLC中，開市位最為重要，因為個人認為開市價係任mark的，只要有錢大戶想mark咩價都可以... 而1月11號既開市位為22800(第一日發力)，而13號既最低位為22786(遇阻力時的支持)，輕微跌穿14點後就秒彈，反映哩個位有相當既指導意義，因此可以解釋到13號出現OI大幅增加而收市變幅少的情況

另外從期權盤路睇，Call同Put大倉均出現上移的情況，反映好友不停向上進攻的同時，淡友無力還擊只好一路退守，導致整體市場重心上移，現好淡分水為226-228，而哩個數正好與上一段所講既支持吻合

圖六, 七所反映既係港股未有俾美股拖住後腿, 暫時仍然能夠保持強勢; 圖八想講咩相信你們都懂的~

總結: 個人認為港股仍然強勢, 雖然暫時230出現一定阻力, 但只要守得住228, 後市仍可繼續向上突破, 如是者相信上方空間會有400-600點(即夾到234-236), 因為如果230係淡友必守之地, 假設你係好友, 你幾經終於辛苦破左佢金鐘罩, 咁你會唔會夾多二百點就散水?