美國非農數據統計

政策市日升日跌, 如果要我估下週既方向我就真係唔識估… 但期權操作靈活多變, 就算唔識測市只要懂得運用, 當中仍然有方法去尋找賺錢機會的, 我地先黎睇睇過往一年非農公布後一週的期指表現:

下圖粉紅色HIGHLIGHT的為跌幅比升幅大的週次, 青綠色HIGHLIGHT的為升幅比跌幅大的週次, 可見粉紅色中最少的跌幅為-2.44%, 而青綠色中最少的升幅為2.13%, 如果以上數字反映既係高低波幅, 咁當然係相當細波, 但哩兩個字數代表既係單邊走勢, 即係假設下週上下單邊唔會行得少於哩兩個幅度, 如果以09/03既日期收市價23499去計算, 上方最少可見空間為23999, 下方最少可見空間為22926, 上下可見區隔足足有成千點咁多, 喺咁既情況下唔LONG兩邊等幾時?

而上/下方可見位, 正正就係我地應該選揀既行使價, 但值得留意, 開倉當時既行使價唔一定係揀LC 240及LP230, 因為以上計算係根據09/03既日期收市價去計的, 而以上統計資料係用NON-FARM公布當日的日期收市價去計的, 即係話, 如果聽日去到四點後期指報梗23200左右, 咁我地就用23200*(1+2.13%)去選擇CALL的行使價, 而PUT的行使價就以23200*(1-2.44%)去選擇, 到時自己計下就會知應該點揀

從以上單邊行500點去計算, 係有足夠幅度令LONG兩邊產生利潤的, 但賺唔賺到錢就好視乎哩500點邊單到底係幾時出現… 因為時間值損耗係LONG兩邊既最大敵人, 而根據下圖統計資料所示, 11次高/低出現時間中, 星期一二出現的次數連1次都無, 星期三出現只有2次, 其餘9次都係星期四五先出現的. 如果大家再睇清楚D, 十一月嗰轉係星期三做哂高低位的, 當日係十一月九日, 自己回憶下係嗰日咩日子吧~ 如果唔計哩個特別週, 即係10次中有9次都係下週後期先會出現高/低位的, 機率達90%, 如果大家無輸兩邊起碼4日時間值黎同佢博既準備(以每邊THETA值為8去計算, 即四日合共輸64點), 就唔好睇落去喇...

不過, 由於現時IV又返返去52週低既水平, 加上下個星期唔係報完非農後一週咁簡單, 美國國會就債務上限達成共識的最後期限, 及美聯儲公布議息結果, 加上荷蘭大選都係喺15/03(星期三)上演, 而歐美交易所多個衍生產品亦將於下星期五(17/03)進行季結, 即係下星期初就會開始轉倉, 好似專登唂埋所有野喺一個星期度做咁(其實個非農應該係上星期五報的, 我真係唔多信係巧合...), 喺預期未來一週波幅會廣大的情況下, IV上升係可以抵銷部份時間值損耗所帶來既負面影響的

所以其實唔需要太過擔心會俾人磨到變灰的, 因為持倉目標時間都只係一個星期, 加上以上計算的可見升/跌幅係用統計結果中的最少值去計算的, 假設未來單邊幅度能夠達到最多升/跌幅的平均值(+3.38%/2.99%), 到時LONG兩邊的預期利潤將會大大提高

另外, 如果大家有聽07/03晚節目的話, 應該仲記得有個策略係喺月中(15號)既時候做博月尾返轉頭的, 而哩個策略其實係可以因應市況同LONG兩邊配合做, 想知點做記得要聽14/03號晚既<<期權行者>>喇^^

祝大家好運!